مد حبلـك بقـدر المستطـاع

مد حبلـك بقـدر المستطـاع
لا توقف مع الصـف الاخيـر
زيح عن هامة العـز القنـاع
سل سيف الشموخ من الجفير
وانتبه مـن شبـاة الاندفـاع
واجتنب شوحة الشبر القصير
احتـرص للهجـوم وللدفـاع
لا تراخـا لكنـك لا تطـيـر
ولا توجهت مع درب السبـاع
شفت عزك ولو انـك فقيـر
المراجـل تزمـك للـرفـاع
لو جدك ماهو شيـخ ولاميـر
كل يومٍ صدى طيبـك يـذاع
في نفوس البشر قدمك سفير
ولا يذمك سوى راسٍ رعـاع
عاجزٍ عن مواصلة المسيـر
صحبة اهل الوفا تدفعك بـاع
وتنزلك منزل الجـاه القديـر
وقيل لن طبت يا طلق الذراع
وان عسرك الحمل مبرك بعير
وصحبة الذل ساس الانهـزاع
ما تزبنك مـن حـر الهجيـر
لا تمنعت عن درب الضيـاع
طحت في بير مدري في غدير
واللوازم هـي ام الاختـراع
وثاقب النظرة اللي يستشيـر
وكل جمـعٍ نهايتـه الـوداع
كود جمع الجنـان وزمهريـر
وكـل جامـد مـرده للميـاع
غير قلب الشجاع ليا استجير
وعلة الناس حـب الاطـلاع
والتجاريـب للسكـة تنـيـر
واكلف النوم مرقـاد الجيـاع
ومقطع الهرج احد من الشطير
بالف عالـم تجيـد الاقتنـاع
وتبلش بجاهلٍ عقلـه صغيـر
ومن تعلـم لفـن الاستمـاع
لا هرج للبشر وانـه خبيـر
وراجح العقل في رايه مطـاع
ومرجع الكل فالوقت العسيـر
حين فرق الرعاع من الشجاع
لستذار الخريش من الصفيـر
رفّه النفـس والدنيـا متـاع
ولا تعود على نـوم السريـر
إنفع ان كان تبغـى الانتفـاع
ابذر الطيـب لليـوم الكبيـر



""منتدى الزعامة""